VIDEO:
YouTube Preview Image

TRANSCRIPT:

Talumpati
ni
Benigno S. Aquino III
Pangulo ng Pilipinas
Sa kanyang pagdalo sa pagpapalit-atas ng Hukbong Dagat ng Pilipinas

[Philippine Navy Headquarters, Manila, ika-4 ng Enero, 2011]

Isang malugod na pagbati sa magigiting na kalalakihan at kababaihan na nagsisilbing lakas ng Hukbong Dagat ng Pilipinas. Isang karangalan na makasama ang lahat ng bumubuo ng Philippine Navy, mula sa hanay ng Philippine Fleet at ng Philippine Marine Corps. Sa ating pagdiriwang, sabay tayong nagpapaalam at nagbibigay-pugay sa isang tapat na pinuno. Narito rin tayo upang bigyan ng mainit na pagsalubong ang bagong pinuno ng ating hukbong-dagat. Hudyat po ito ng isang bagong pag-asa sa inyong hanay, isang panibagong pagbubukas para sa mas maunlad na pagbabago.

Subok na ang kasanayan sa pamumuno at galing sa pamamalakad ni Rear Admiral Danilo Cortez bago pa niya tanggapin ang katungkulang kanyang huling ginampanan. Sa loob lamang ng walong buwan, buong-pagpupursiging inilapit ni Rear Admiral Cortez ang Navy sa katuparan ng inyong tunguhin: ang maging isang hukbong matatag, may paninindigan, at tinitingala ng lipunan. Tapat sa kanyang panata, itinuon ni Admiral Cortez ang kanyang pamumuno sa pagsusulong ng mga angkop na programa sa ilalim ng inyong roadmap—ang Navy Strategic Sail Plan 2020. Isa po dito ang pagpapabuti sa Coast Watch South Initiative. Gamit ang estratehiyang ito, mababantayan at mapoprotektahan po natin ang Sulu at Celebes Sea na pumapalibot sa Malaysia at Indonesia. Sa inisyatibang ito, haharangin natin ang masasamang elemento sa paglabas-masok sa ating teritoryo.

Sa pakikiisa rin ng inyong hanay sa Department of National Defense, napaigting natin ang mga hakbangin tungo sa implementasyon ng Coast Watch System na bahagi ng modernisasyon ng Armed Forces of the Philippines. Kaugnay nito, mayroon na tayong labing-apat na Coast Watch Stations na buo ang kapasidad na mangalap ng mahahalaga at napapanahong datos upang mas mahusay na mabantayan ng Philippine Navy ang ating teritoryong pandagat.

Kinikilala din po natin ang mahahalagang kontribusyon ng Navy sa pagpapatatag sa ating lipunan sa pamamagitan ng inyong disaster response at humanitarian relief efforts. Sa panahong nabalot ang ating bansa sa kadilimang dulot ng kalamidad, kayo ang nagsilbing liwanag sa maraming Pilipino. Kapuri-puri rin po ang naging tagumpay ng Navy Task Group Amianan Recovery para makabalik sa normal na buhay ang mga apektadong residente ng Isabela matapos humagupit ang bagyong Juan nitong Oktubre. Maraming salamat sa inyong di-matatawarang dedikasyon na bigyan ng proteksyon ang ating mga kababayan sa oras ng pangangailangan.

Kasabay nito, nais ko ring bigyan ng karampatang pagkilala ang maigting na pagpapatibay ni Rear Admiral Cortez sa ugnayan ng Navy sa iba pang maritime authorities, lalo na sa iba pang bansang nangangalaga sa kaligtasan ng Asya-Pasipiko. Dahil dito, napabuti ang pagkakaisa ng iba’t ibang bansa upang labanan ang mga maritime threats sa karagatan. Dahil sa mga pinangunahan niyang reporma, tulad ng pagdadaos ng mga pagsasanay at talakayan, naisabuhay ninyo ang diwa ng demokrasya sa inyong ahensya—ang pagkakaroon ng malinaw na hangarin at patakaran ng mga nasa katungkulan at ang paglilingkod nang tapat sa sinumpaang tungkulin.

Sa pagsasara ng tatlumpung taon ng mayamang panunungkulan ni Rear Admiral Cortez sa hukbong dagat, kanya namang ipapamana ang ehemplo ng mabuting pamamahala sa kahalili niya sa posisyon na si Rear Admiral Alexander Pama. Isang beterano sa mga kampanyang tumutugis sa Abu Sayyaf, napatibay niya ang pagdedepensa ng pwersang pandagat sa kanlurang bahagi ng Mindanao. Tapat at buong tapang rin siyang nanilbihan mula 2008 hanggang 2010 bilang commander ng ating Naval Forces sa Western Mindanao at kasabay nito, ng Joint Task Force Trillium, na siya ring tumutugis sa Abu Sayyaf sa Basilan at Zamboanga. Dahil nga dito, kinilala natin ang kanyang di-matatawarang serbisyo-publiko sa pagpaparangal ng Distinguished Service Star Award noong ikapitumpu’t limang anibersaryo ng AFP nitong Disyembre. Pinatunayan ni Rear Admiral Palma ang kanyang kakayahang pangunahan ang ating hukbong-dagat, at ikinalulugod kong matiwasay na maipapasa ang pinakamataas na katungkulan ng inyong hanay sa isang mapagkakatiwalaan at maaasahang pinuno.

Kasama ang sambayanang Pilipino, umaasa akong maipagpapatuloy mo ang kahusayan at sipag na ipinamalas ng iyong sinundang pinuno. Makakaasa ka sa suporta ng aking administrasyon,

Kasabay ninyo akong sumusuong din sa mga hamong dapat pa nating lampasan. Sa ating bayanihan at sama-samang pagkilos nang may iisang layunin at direksyong tinutungo, balewala ang banta ng terorismo, mabilis tayong makakabangon sa hagupit ng kalamidad, at madali nating magagapi ang mga kalaban nating ayaw makiisa sa ating pagsisikap na matupad ang pagbabago.

At para sa buong puwersa ng ating hukbong dagat: saludo ako sa pagtupad ninyo sa inyong tungkuling protektahan ang ating teritoryo, nariyan man ang mga balakid tulad ng mga pinaglumaang barko at kakulangan sa ilang mahahalagang kagamitan. Asahan po ninyong doble-kayod din ang inyong gobyerno upang makahanap pa ng maiinam na paraan upang mapabuti ang mga ito at maipagpatuloy ang integridad ng ating hukbong-dagat.

Malaki ang aking kumpiyansa na habang pinapalakas natin ang inyong hanay at isinasaayos ang inyong mga kagamitan, patuloy ninyong mapapangalagaan ang kaligtasan ng ating karagatan, lalo na sa mga isinasagawang petroleum exploration sa Kalayaan Island Group, Malampaya, Palawan, Mapun, at Sulu. Patunay ito sa malaking ambag ng inyong hukbo, hindi lamang sa aspektong pangkaligtasan ng ating bansa, kundi maging sa pagpapalakas sa potensyal ng ating pambansang ekonomiya.

Hindi kailanman masusuklian ng anumang halaga ang inyong pagsusumikap na ipagtanggol ang ating bayan. Kaya naman pinipilit nating makabawi sa inyong sakripisyo, sa abot ng ating makakaya. Kaya naman po hindi lamang bagong taon ang ipinagdiwang ng mga sundalong rumeresponde sa mga lugar na balot pa rin ng tensyon. Sumalubong din po sa kanila ang karagdagang combat allowance na nagkakahalaga ng 260 pesos. Sa madaling sabi, kapag ipinatong ito sa kasalukuyang 240 pesos na combat pay, limandaang piso na po ang matatanggap na kabuuang sustento ng ating magigiting na sundalong nagtataya ng kanilang buhay sa pagsabak sa mga combat operations. Muli, kakarampot lamang po ito kung itutumbas sa inyong mga sakripisyo. Pero kung may paraan naman po tayo para dagdagan ang inyong benepisyo, bakit naman po namin ito ipagdadamot sa inyo, hindi po ba? At tuloy-tuloy na po ito. Mula sa armas, hanggang sa mga barko; mula sa mga benepisyong pangkalusugan, hanggang sa mga pabahay, titiyakin nating makakatanggap ng sapat na pabuya at sustento ang atin pong hukbong-dagat.

Sa ating panunungkulan, sinisikap nating muling buhayin sa lahat ng kawani ng gobyerno ang ating panata para sa mabuting pamamahala. Sa pagharap natin sa panibagong taon at panibagong pamumuno sa inyong hanay, manatili sanang gabay natin ang nasilayan nating liwanag ng pag-asa buhat nang tahakin natin ang tuwid na daan. Sa pagpapaningas pa ng liwanag na ito, unti-unti nating nahahawi ang kadiliman kung saan namayani ang panganib dulot ng katiwalian at kahirapan. Nasa katayuan na tayo upang mangarap muli, nasa atin na ang epektibong sandata upang magwagi: ang tuluyang maibalik ang nawalang tiwala ng publiko sa ating kakayahang paunlarin ang bayan. Nawa’y huwag nating bibiguin muli ang mga Pilipino. Sa gabay ng liwanag, sama-sama nating muling ibangon ang dangal ng ating Hukbong Pandagat, ng Sandatahang Lakas at ng sambayanang Pilipino.

At bago po ako magtapos, sa isa pong mga briefing diyan nga ho sa Kalayaan Island Groups, ako po’y nabigla na alam ko pong kakaonti ang ating mga barko. Pero nabigla po akong iyong dadalawang barkong hinati iyong Palawan sa limang distrito, isa pa pala doon ay de-katig pa hanggang sa ngayon. Sa pagkaintindi ko po, sa Biyernes mayroon kayong meeting kung saan niyo pipiliin iyong mga karagdagang mga barko para magamit sa kaligtasan ng ating national territory. Kayo rin po ay kasama sa mga boss namin; at kung kulang pa ho iyan—at palagay ko nga ho’y kulang pa—naandito naman po ang mga epektibong mga tagamunkahi ng ikabubuti po ng ating Hukbong pang-Dagat. Nandiyan na po at ating Phillipine Commandant na ngayon po’y congressman, Chairman ng National Defense, Congressman Biazon. Ang atin pong Vice President ay alam ko pong currently nasa reserve ng Philippine Marines. At kung kulang pa ho silang dalawa, ang Chairman ng Appropriations ay dating nagmula sa inyong hanay: si Jun Abaya. At kung saka-sakaling kukulangin pa rin ho ang kanilang mga munkahi, ang tatay ko po’y pagkakaintindi ko ang Commission ay nasa Philippine Navy rin. Siya na ho siguro ‘yung huling dadalaw sa atin pag hindi ko kayo inalagaan.

Huling-huli nalang po: Ako po ay may binati isang kumpanya, ang ngalan ay Convergys. Noong ininaugurate [inaugurate] po namin iyong kanilang tanggapan, sa unang araw kinulang na raw sila ng espasyo, nagdagdag ng isa. Kamakailan po’y ibinalita sa akin, kinulang na rin po iyong dinagdag nila, dalawang floor na naman po ang kinuha nila. Eh napakabagal ho yata iyong nagrereport sa akin, dahil ayon doon sa tagapamahala, talaga pong napakaganado ng kanilang mga investor, hindi na ho pala nagdagdag ng floor, gumawa ng panibagong gusali na sa iba pang lugar at nagdagdag ng trabaho at parami pa raw nang parami ito. Talaga naman po: pangalagahan natin ang katahimikan, pangalagahan natin ang atin pong mga kababayan, tuloy-tuloy na po ang asenso ng Pilipinas.

Magandang araw po. Maraming salamat sa inyo.


Share on social media